吳京吐氣揚眉,《戰狼2》成功的啟示

Horace Chan 9/2/2017 12:00:00 AM 影評

2008年吳京自導自演拍下由黃柏高吳思遠出品《狼牙》,七年後自編自導自演國內電影《戰狼》,票房收5.45億人民幣, 片中出現大量坦克以及直升機進行實戰拍攝, 尤如戰爭電影,成績平平,吳京大顯身手機會亦聊聊可數,只係得最後一場幾分鐘同外籍演員飾演反派對打一場。

今次續集《戰狼2》,無疑娛樂性遠遠勝過第一集,吳京由頭打到落尾,戲種同上集亦截然不同,似足成龍全盛時期港產片動作喜劇路線(幕後不乏香港電影工作者,如上集攝影敖志君,剪接張嘉輝,黃偉亮動作設計),片初非洲附近的大海水底對打,似足二十年前成龍《警察故事4之簡單任務》。

吳京繼續飾演冷鋒因傷人被開除軍籍並被判監禁。坐牢期間,前集女主角余男飾未婚妻龍小雲,向其求婚,卻在前往邊境執行任務時再沒回來。冷鋒帶著龍小雲失踪現場留下的一枚特別的子彈,在非洲輾轉三年尋找其下落,被捲入某不具名的非洲國家的動亂。冷鋒呢個角色刻劃比上集更具立體,一個感情有過去嘅男人,同其他非洲男人對飲矛台,更令人想起上集余男。

無疑,冷鋒喺非洲工作情節,亦非常符合中共所提倡嘅一帶一路政策,說《戰狼2》係動作喜劇電影,應該說是愛國動作電影才更準確,例如面對非洲政變動亂,中國領事館突然變成『盧旺達飯店』(Hotel Rwanda),成為動亂下最安全避難地方。甚或後段只要舉起中共五星國旗,在戰亂地區可以令敵對兩方即時停火就能避開叛軍殺害,當然還有最後出end credit前中國護照個大shot,實在符合國內觀眾日益高漲愛國民族主義情懷。

但話說回來,吳京今次喺動作場面(配上Sam Hargrave,黃偉亮動作設計)亦落足心機,例如敵方航拍追殺,及後段坦克漂移對決,都格外過癮。中段出現《狼牙》女主角盧靖姍九年後再同吳京結片緣,感情交流同動作跟吳京亦非常合拍。其他演員,飾演吳京非洲契仔及其母很惹笑,張翰吳剛出現分擔吳京動作戲分。外籍演員Frank Grillo飾演反派都係一貫面目模糊反派樣板。

吳京從影二十多年,雖然曾經受過黃柏高力捧,但最終星途未能更上一層樓,而一度喺不少港產動作片淪為配角。如今《戰狼2》大賣,吳京終於吐氣揚眉,實在令支持吳京多年影迷感到欣慰。

正當成龍李連杰甚至甄子丹呢班五六十年代出世動作影星日漸年華老去,今年才43歲吳京顯然如日方中,正當大家正擔心港產動作片因後繼無人蒞臨失傳之際,《戰狼2》成功(如今票房已過五十億人民幣,遠遠大勝有政府支持票房還未到四億人民幣《建軍大業》。)再配合中國國內有大量有潛質動作新人,動作片可望再喺大中華薪火相傳。

網主 Horace Chan

你可能感興趣

即將上映