《追龍》:既然珠玉在前,可必草草了事?

陳子斌 10/7/2017 12:00:00 AM 影評

90年代兩部經典嘅人物傳記片,一部係麥當雄蕭若元編劇監製嘅《跛豪》,由增肥40磅嘅呂良偉擔正, 另一部係劉國昌導演陳文強編劇《五億探長雷洛傳》, 劉德華主演仲有非常精湛演技嘅關海山,如今王晶重新拍攝跛豪呂樂,以其一貫嘅拍攝手法同埋佢嘅有幾認真程度,成績當然不能寄予厚望。

事實上早幾年前王晶亦都有搞過另一部關於六七十年代香港警廉衝突《金錢帝國》,合演有梁家輝黃秋生陳奕迅,除咗一貫嘅王晶式扭橋風格,故事手法亦都頗為平鋪直敘, 成績普通。其實王晶嘅電影經典要數都數到上世紀80年代《賭神》或者《至尊無上》,90年代都曾經跟風拍過劉德華主演《新哥傳奇》影射澳門賭王何鴻燊。

如今《追龍》請攝影出身關智耀聯合導演,毫無疑問影像上係有一定貢獻,製作上亦都有一定嘅規模,美術道具服裝都跟足60年代香港, 街景甚至六七十年代嘅巴士嘅都有出現,電腦特技所做出飛機下飛過嘅九龍城寨,喺呢方面比早前劉國昌《毒誡》 亦都係有九龍城寨嘅面貌,但《追龍》更加有過之而無不及。

今次請出兩大明星甄子丹同埋劉德華首度合作,劉德華做返雷洛嘅中年版本, 當然比起25年前做雷洛更加得心應手(想當年嘅雷洛傳下集頗為難看 遠遠不及上集可觀),甄子丹做跛豪當然不能夠同呂良偉相提並論,但能夠看到佢嘅用心。

雖然不能夠同兩部經典相提並論, 但始終王晶都係能夠做到通俗熱鬧,前半段講述跛豪同兄弟偷渡嚟香港發跡並參與大規模嘅街頭打鬥,場面似足古惑仔類型電影,跛豪之後又獲得又吳毅將飾演黑幫大佬青睞,而要同手下伍允龍一場對打, 當然係為打而有呢場戲, 故事嘅中段跛豪入城寨要救雷落,結果右腿被重創成為「跛豪」,高潮迭起亦都很悲壯,更令二人成為莫逆之交。

故事發展落去劇情亦都係不斷暴力煽情堆砌,為咗討好大陸觀眾而將港英時代嘅外籍警察妖魔化, 結尾嘅大壓軸亦都顯出嚴重嘅劇情失控,六七十年代嘅香港街頭彷彿變成上海外灘黑幫警察亂槍對峙, 兩幫人沒頭沒腦你打我我打你, 明顯地看出劇本草草收場,全片雖然喺影像同埋製作上有唔錯嘅條件,但最敗北都係劇本,人物性格刻劃粗疏, 合演嘅配角都非常多,例如湯鎮業飾演另一位華探長顔童本來應該有戲但係真係發揮不多,上次喺《跛豪》出現過嘅鄭則士今次飾演雷洛身邊嘅豬油仔亦都只限於跟出跟入, 比較突出係黑社會反派吳毅將同埋比較冷豔飾演玫瑰嘅徐冬冬。

王晶嘅編劇功力過去都唔係差到咁, 以前記得90年代有部《龍在邊緣》左抄右抄都叫做見得下人, 唔知係咪因為年過花甲而力不從心,係咪因為有咗兩粒大卡士所以就將貨就價,諗住六七成功夫部戲可以照舊賣座? 早排上映嘅《黑白迷宮》王晶只做監製同編劇效果都並不太難看,新人導演闞家偉亦都有板有眼, 王晶從今以後都係只適宜做監製同編劇,又編又導又做監製就可免則免。

Site owner 陳子斌

你可能感興趣

即將上映